2011年2月24日 星期四

中產



每年一度的財政預算案我從來都懶得即場收看,只留待看當晚的新聞報告及第二天的報紙,因為很明白,這種預算案不會是預算怎樣利民舒困,而只是「求其」交差之作,故不會期望預算案會有甚麼令人振奮的政策。


反而,近幾年聽見那些年薪百萬的所謂中產的回應,就真的「眼火爆」。


年薪百萬的工程師投訴為甚麼交了那麼多稅,竟然沒有「着數」可以拿,說對中產很不公平。工程師啊,你只要肯放棄你的百萬年薪去拿綜援,不就是有着數了嗎?又或者打斷自己雙腿,就可以拿傷殘津貼這種着數。你貪戀區區百萬而不去拿着數,是你自己笨而已。


有個女教師說一直買不到樓,投訴財爺不幫他們這種中產人仕置業。女教師啊,你現住在哪裏呀?板間房?籠屋?天橋底?你是教師都不買不到樓,那麼你學校裏面的文書、會計、校工更加買樓無望了,真慘啊!不如將政府庫房所有錢拿出來幫全港市民置業,每人一層樓好不好?那麼,每人一層樓應該要多大才合適呢,地點在哪兒才貼合你的需要呢?要不要人人都住向南望海的三十八樓呢?你既然是個教師,你中英數總有個譜吧,不如就由你來撰寫這個一人一屋的財政預算案,好給我們大開眼界嘛。


記得是去年還是前年,又是一個年薪百萬的中產,上電視訴說供樓供車供子女讀國際學校怎樣入不敷支;日子過得怎樣艱難,要求政府幫他的子女交學費,其他人可以享有九年免費教育,為甚麼他的子女不可以,為甚麼他只有交稅的份沒有享用福利的份。


我不知道上述的中產來自何方,如果是在香港出生在香港長大,如果沒變身中產前是低產,那麼他們的教育醫療應該曾被政府資助過,亦可能住過公屋。這些中產也應該是拿「着數」拿了好多年,才做得成中產吧。


中產讀書多,收入高,是社會的中流砥柱,對政府有所要求理應是長遠政策及整體社會福利。但眼下所見的中產,只爭個人利益,將政府庫房的錢看成賊贓,大家要平分,吵吵鬧鬧,只因分贓不勻,為甚麼他有我沒有。這算是甚麼中產!


每次見到那些百萬中產問政府要錢的樣子,就越覺得香港淪落。



8 則留言:

  1. 全面讚同,最衰就係啲政治佬,連建制派班 "不該" 都喺道吟話派糖唔夠多, 唔使本咩.....
    咁攪落去似乎香港人唔係幾夠成熟文明嚟享受真正民主喇...
    死囉,社民連派人嚟暗算我喇...
    [版主回覆02/25/2011 18:53:00]咪就係喱班人成日要政府派糖囉,搞到連班所謂高學歷高收入嘅中產都好似細路咁 lur 糖食,幾肉酸呢!

    回覆刪除
  2. In the US Middle Class got the shaft all the time!  Certain income tax bracket favors the upper class by allowing them to pay less after a certain amount incomes, and the lower income always receive gov't assistance and pay little tax....Middle class gets nothing and pay the most taxes!  That's the truth!!
    [版主回覆02/25/2011 18:55:00]香港薪俸稅最高 17% ,綜援金兩千都唔夠,傷殘津貼坐輪椅都係得千幾蚊,要癱喺張床到先有二千幾。政府話送一個月綜援金、傷殘津貼,喱班百萬中產就眼紅,問點解佢哋冇份。中產交稅交得多,佢哋爭取多啲福利冇問題,但都起碼係長遠啲、整體性嘅福利,而唔係人哋有得攞兩千蚊我又要攞兩千蚊囉,百萬年薪嘅中產喎,幼唔幼稚啲呀!

    回覆刪除
  3. 佢哋就係投訴點解交咗咁多稅都會無著數.......下層政府照...上層又官商勾結.................佢哋好似乜都無-咪覺得唔抵囉...........
    [版主回覆02/25/2011 18:58:00]有幾多個中產由出世開始都冇去過公立醫院;冇住過公屋;唔駛政府交學費,冇用過圖書館/球場/公園。
    叫得中產都係高收入高學歷,係咪應該眼界闊啲要求高啲呢。就好似有個月入四萬嘅教師,話自己冇父母冇仔女冇強積金,一啲着數都冇得攞好唔抵,所以要求政府派錢。一個阿伯冇收入冇仔女冇強積金要求派錢就話啫,月入四萬都要政府派錢?咁咪即係同細路爭糖食囉,仲話教師喎?

    回覆刪除
  4. 綜援金兩千...?  
     
    我好似睇過報紙話有啲人攞 綜援 萬萬聲播,但係中文報,可能係我睇錯哂...
    [版主回覆02/25/2011 20:36:00]基本金額兩千,但仲會有其他各樣津貼,一家人攞加加埋埋就會過萬。單靠綜援生活都唔容易架,可以去遊埠嗰啲係呃綜援,有收入又去攞綜援。仲有一種係假離婚,單親家庭綜援金多啲,住公屋又唔駛比錢,個離婚老公就一齊住日日照返工賺錢,聽講天水圍最多單親綜援戶。

    回覆刪除
  5. 政府本來應該是劫富濟貧的羅賓漢,從富人那裡抽稅來養窮人。百萬中產如果想享受支助,大可送兒女去官校。但問題是現在政府是劫貧濟富的漢賓羅,把該還諸與民的錢幫我們亂投資,得益只會是股票市場的大鱷,尚不知會不會又有一個雷曼在cap 水。
    [版主回覆02/26/2011 16:20:00]政府無能的確係抵鬧,身為高學歷嘅中產照理應該走出嚟批評/鞭策/建議政府,但我睇到嘅係,百萬年薪嘅中產走去問政府攞錢,態度係唔執輸慌死蝕底,十足十細路爭糖食,好難睇。

    回覆刪除
  6. 我覺得政府有咁多盈餘應該還富於納稅人囉 !!
    將我D血汁錢養D懶人,仲要受佢哋氣咁先唔值 !!!!
    [版主回覆03/01/2011 13:42:00]因為政府上年計算錯誤,所以今年先有咁多盈餘。庫房水浸,大可以下年度免交稅,亦可以將錢去起醫院、安老院、康樂場館等等。政府唔同做生意嘅公司,有錢賺就分紅,冇錢賺就執苙,政府冇得執苙,納稅人亦唔係同政府打工,關係就似屋苑啲住戶同管理公司,管業處有盈餘唔係攞出嚟分咗佢,而係用嚟翻新外牆換水喉等等。

    回覆刪除
  7. "態度係唔執輸慌死蝕底"
    美國愈來愈多啲咁人 decline of American civilization la...
    香港又好學唔學...
    [版主回覆03/01/2011 13:44:00]喱啲嘢唔駛學,係人類嘅劣根性,只要環境配合,就會發出嚟。

    回覆刪除
  8. 五星下的三星2011年3月1日 上午10:42

    完全認同!  中產人士做得咁唔開心,一係諗計爬上可以同官勾結的層次,如果做唔到又覺得唔抵,咪真係走去申請破產囉,咁唔抵得人地有兩個月公屋免租,大可以自己諗辦法窮d去申請架。 而家社會真係有一種「爭產」的風氣,老豆有就爭老豆,熟人有就扮老公豬都要爭一份,樣樣都冇就走去爭政府的一份,最好幾千億完全平分晒畀市民,以後一了百了,大家咩都冇得嘈。
    [版主回覆03/01/2011 13:44:00]而家就係有大學生為咗可以輪上公屋,整窮自己。人哋要冒咁大風險去霸間屋,霸到都抵佢喇。
     
    幾千億分晒畀市民,咪一樣有得嘈,有人又會嘈點解 Li+x 都有得分。
     

    回覆刪除